زيدها تمرة

[عسل مكة]

حكاية حجازية


من كتاب {مكلف شي وشويات من حكم والغاز وحكايات}


للأستاذة /عزيزة الصيرفي.

{ زيِدهـَا تَمنّة}

زيدها تمرة

وحدوا الله..... لاإله إلا الله.
وإللي عليه ذنب وخطية يقول أستغفرالله. أستغفر الله.
ولايحلى الكلام إلابذكر النبي عليه أفضّل الصّلاة والسلام.
اللهم صّلي على محمد وعلى آله وصّحبه الكرام.


كان ياماكان في قديم الزمان وسالف العصّر والأوان.كان في واحد رجال إسمه زيد أتزوج وحدة إسمها إقبّـال ,حلوة وجميلة وبجمالها تنضّرب الأمثال. بعيده عن بلده أميال وأميال, ولما أنتهى شّهر العسل رجع بيهاعلى بلده فرحان, لكن ياخسارة, طلعت عويلة وبنصّ لسان. { كناية عن الكسل وعدم الحركة ولا تخرج الأحرف من مخارجها الصّحـيحة } كل يوم تقول لزوجها وهو خارج الدكان: هات معات لـُبّـةّ {خبز}وزبّنة{جبنة} وأحيان تقول له: زيـّدها تمّنة { تمرة }. ولا تطبخ ولا تشّوف شّغل بيتها بالمرة. وطول النهار ماسكة المرايا والملقاط, تخرج من حواجبها شّعرة زادت أومن الساق.وكل ماقال لها زوجها:يابنت الناس.. قلبي وبطني حرقوني من اللـّبة والجبنة, نفسي في صّحن إدام, شّهر العسل خلص وأخذ الدلع معاه. تقول له:وآآآي.... مافي أتـْبح وأوسح المتبح {مافيّ أطبخ وأوسخ المطبخ هات الأتل معات وحلاس { هات الأكل معاك وخلاص}.
جاب زيّد زنبيل المقاضّي كم مرة, واترجاها تطبخ له صّحن إدام,لكنها توزع زنبيل المقاضّي على الجيران. وكم مرة فكريطلقها ويرسلها لأهلها, ويستريح من وجع الرآس, لكنه يفتكرحبها إللّي ملّىَ قلبه والإحساس, وطيبت أهلها إللي زي الذهب والأماس. ولوكانوا جنبها,كان قدر يشّتكي لهم منها.
جلس زيّد في القهوة زهقان سرحان, شّافه صّاحبه سمّعان. قال: خير ياعريس الأحلام ؟ قال زيّد مافي شّي. قال سمعان: مافي شّي....!! علينا يابويا وعلى قول المثل {على وجهك يبان يامداغ اللّـبان} ولا {إذا ما أشّتكى العيان على وجهه يبان}قال :أقول لك مافي شّي... سيبني في حالي يابني آدم.حاول معاه سمعان, يبوح بسره يمّكِنْ يلاقي له حل أوخلاص.
تحت الإلحاح فك زيّد صّدره لسمعان وحكاه حِكايته مع مرته إقبّـال. فكر سمعان شّوية وقال :إيه رأيك أستشّير ست الحبايب أمي, وأجب لك الحل بكرة معايا بدري.
وافق زيّد مجبور, يطلع أسرار بيته ويدورعند الناس حلول. ومن فالق الإصّباح { قبل طلوع الشّمس}راح زيّد ينتظر سمعان, عساه لقاله حل يخلصّه من كسل مرته إللّي جاب له الجنان .
جا سمعان وقال الحل لزيّد فرحان, قام زيّد وبسرعة راح على البيت وقال لإقبّـال :إيشّ أبشّرك خالتك فايقة وصّلت من الشّام, وجية تقعد عندنا كم يوم ياإقبّـال.
أنفجعت إقبّـال وقالت:أنا ماعندي حالة مسافلة على السام{أنا ماعندي خالة مسافرة على الشّام}قال لها أهى جيـّة ورايا مع ولد الجيران .
دق ولد الجيران الباب خرجت إقبّـال وأسقبلتها خالة فايقة بالأحضّان. وقالت لها :ماشّاء الله عليك صّرتي عروسة ياإقبّـال. لما أتزوجت وسافرت على بلاد الشّام كنتي صّغيرة, ولما مات زوجي رجعت على بلدي وسألت عنك, قالوا لي إنك هنا, قلت أجي أجلس عندك كم يوم أنسى فيها الأحزان. مشّي الكلام على إقبّـال ,وأنطلت عليها الحيلة قوام .
وقِفْ زيّد من عند ّالباب وقال: إشّ أجيب على الغدا ياإقبّـال؟ قالت له: جيب معات لبـّة وزبنة وزيدها تمنة. راح زيّدعلى السوق, وقضّى زنبيل المقاضّي وجابه على البيت, ورجع على شّغله في الدكان. قالت إقبّـال: حسبي الله عليك من رزال أدول سي ويزيب سي{ حسبي الله عليك من رجال أقول شّي ويجيب شّي}قالت لها خالة فايقة: قومي وهاتي الزنبيل ياإقبّـال, نقطف الملوخية ونقطع اللحمة ونركب قدورالإدام.قالت إقبّـال :أنا ماأعلف أسوي سي من تـُل هادا التلام { أنا ماأعرف أسوي شّي من كل هادا الكلام } قالت لها: قومي وهاتي الزنبيل وانا أوركي ياإقبّـال. قامت إقبّـال جابت الزنبيل ورزعته
{وضّعته بقوة}قدام خالة فايقة وجات ماشّية تبغى تدخل غرفتها زي عادتها تنام .قالت لها خالة فايقة بحمشّة{غضّب} أجلسي قدامي يابنت الناس قوام. جلست إقبّـال قدام خالة فايقة وصّارت تعلمها كيف تقطف الملوخية بكم سبّة وتقطع اللحمة بكم شّتـّمة, وكل هادا بالضّحك والهزار, حتى لا تزعل وتبرطع زي الحمار. وركبتْ {طبخت}قدرالرز الأبيضّ جنبه على النار .
جا زيّد بعد الظهرعلى البيت جيعان ,غرفت إقبّـال الأكل وجلست معاه تشّتكي له من خالتها فايقة أشّكال والوان, صّبرها زيّد وطيب خاطرها وقال لها: خالتك ضّيفة أستحمليها وإكرام الضّيف واجب وكم يوم تروح في حال سبيلها ياإقبّـال.
جلست خالة فايقة عندهم كم يوم علمت فيها إقبّـال الطبخ والنفخ, وترتيب البيت ونظافته, وصّارمن نظافته تـِكُبْ العسل على الطبطاب {أرض من إسمنت} وتلحسه,وتشّـم النظافة من ثاني حارة ,بكم لكْمة على كم قرصّة, وكل هادا بالضّحك والسوطرة { المزاح }وعلى قول المثل {عند المزاح تشّتفي الأرواح} ولما أتأكدت خالة فايقة من شّطارة إقبّـال. أرسلت إشّارة لزوجها زيّد إن الأمرأنتهى خلاص علشّان يرسل لولدها يجي يآخذها على البيت, بعد ما تمت جميلها بتعليم وتربية إقبّـال.
قالت خالة فايقة:والله أهلي وحشّوني يابنتي وأبغى أسافر لهم خلاص .على طول هوا ردت إقبّـال:صّادتة ياحالتي فايدة متى تبدي تلوحي دوليلي علتان أتلم ديد{صّادقة ياخالة فايقة متى تبغي تروحي قولي لي علشّان أكلم زيّد} ضّحكت خالة فايقة وقالت لها:وووه ه ه يابنتي... قد كدة مستعجلة على سفري؟ ربك يسهل ياإقبّـال يمكن أجلس كم يوم كمان. قامت إقبّـال مبرطعة { زعلانة } تسوي براد الشّاهي, بعد ماطارت فرحتها بالفرج من هادي الحرمة إللي طيرت من عيونها لذيذ المنام .
دق سمعان الباب في الليل, وجا يآخذ أمه.قامتخالة فايقة ولمّلمَتْ بقشّتها{ جمعت صّرتها} وهي خارجة قالت لإقبّـال أحسن الكلام, ووصّتها ببيتها وبزوجها,وقالت لها إن الرجال صّبر سنة ماصّبرالثانية, والجمال والمال مايغنوا الوحدةعن الشّطارة في البيت وخدمة الرجال, بيتك ورجالك ياإقبّـال, حطيهم في عينك ولا تطيري من يدك أحسن الرجال, إللّي صّبرعلي عوالتك{كسلك} كل هادي الأيام.
أستمرت إقبّـال على الشغل والشطارة شّهور وأيام, وكل ماكسلت وحبت تقضّيها لبة وجبنة يقول لها زيّدمازح:الله يسوقك ياخالة فايقة سوق السحاب, ونرجع ناكل من يدك المقلقل والكباب.تردعليه إقبّـال وتقول له: دترها في التانون {ذكرها في الكانون } فال الله ولا فالك ياسيخ, التيب أحتن والتلام{ياشيخ الطيب أحسن والسلام} وتقوم على شّغل بيتها قوام, لا تروح تطلع لها خالة فايقة من ورا الجداران تقلق راحتها وتطير من عينها المنامّْ ..

وتوتة توتة فرغت الحدوتة .
لو كان بيتي قريب كان جبت لكم شّوية لوز وزبيب
ولوكانت طاقية صّفوان ماهي مخروقة كان جبت لكم شّوية مسلوقة..

 

[عطر الورد408]

^_^

حكايه ظريفه ومفيده

شــــكرا لك

تقبل مروري

[؛عاشقــــــــــة الجنـــــهـ؛]

مرسي ياعسل
ع القصه استمتعت في قراتها
سلمت الانامل ياعسل
تقبلي مروري

[ملامح ملكية]

ههههههههههههههه
قصه حلوة مره
واحلا شي انها بالحجازي
يا زين ستات البيوت
ثانكس على القصه